Jafar Shirazi
din dahakti dhuup ne mujh ko jalaya der tak
raat tanha.i men kaala abr barsa der tak
tu ye kahta hai ki tu kal raat mere saath tha
main ye kahta huun ki main ne tujh ko DhunDa der tak
paas rakh kar ujle ujle duudh se yadon ke jism
der se baiTha huun men baiTha rahunga der tak
pahle teri chahaton ke gham the ab furqat ke dukh
mujh pe ab taari rahega ye bhi arsa der tak
kaun Thahre aane vaale mausamon ke samne
kaun ḳhali rakh sake taq-e-tamasha der tak
ab vo baten ab vo qisse kis tarah ‘ja.afar’ bhula.en
aise sadmon ka asar dil par rahega der tak
Leave a Reply