din-Ba-din Ab Lutf Tera Hum Pe Kam Hone Laga

Siraj Aurangabadi

din-ba-din ab lutf tera ham pe kam hone laga

ya to tha vaisa karam ya ye sitam hone laga

sach kaho taqsir kya hai ashiq-e-mazlum ki

nimcha tirchhi nigah ka kyuun alam hone laga

tegh-e-abru kuun nipat kaste ho pan hairan huun main

kaun se bimar par ye aab dam hone laga

shukr-e-allah sarv-e-rana ke tasavvur ke tufail

rafta rafta dil mira bagh-e-iram hone laga

bas karo ai shah-e-fauj-e-husn qatl-e-am kuun

ashiqon ki aah ka neza alam hone laga

tujh kuun ai ahu-nigah kis ne sikhaya ye tarah

ya to tha auron siin ram ya ham siin ram hone laga

hijr ki raton men ye misraa hua vird-e-‘siraj’

din-ba-din ab lutf tera ham pe kam hone laga