muneer-niyazi

Din Agar Chadhta Udhar Se Main Idhar Se Jagta

din agar chadhta udhar se main idhar se jagta

husn saara mashriqon ka saath mere jagta

main agar milta na us se is azal ki shaam men

khvab in divar-o-dar ka dil men kaise jagta

hai misal-e-bad-e-gulshan jagna us shokh ka

rang jaise duur ka rangon ke pichhe jagta

ab vo ghar baaqi nahin par kaash us taamir se

ek shahr-e-arzu ankhon ke aage jagta

chand chadhta dekhna behad samundar par ‘munir’

dekhna phir bahr ko us ki kashish se jagta

More Poems

Leave a Comment