dilon pe chhane laga dhaḌkanon ki jaan hua
jab ek umr guzari to main javan hua
jo bolta tha to mujh se shikayaten thi bahut
main chup hua to use ḳhauf ka guman hua
safar ka hausla rakhta hai uḌ bhi sakta hai
ye aur baat parinda lahuluhan hua
yahi sabab hai ki har dil men ja ke basta hai
makan jis ne bana.e vo la-makan hua
koi to hai jo himayat men haq ki nikla hai
ḳhuda ka shukr ki koi to ham-zaban hua
chalo ki pahre uTha den ham apne jiine se
ye roz qiston men marna azab-e-jan hua
falak ke chand-sitaron pe aa ga.i raunaq
zamin se kis ka safar ru-e-asman hua
vo ek pyara sa manzar hai meri ankhon men
laḌe khilaunon pe bachche main darmiyan hua
hila na pa.engi mujh ko ab andhiyan ‘nashir’
main bojh sahte hue peḌ se chaTan hua
Leave a Reply