Arsh Malsiyani
dil un ka hai kuchh aur to hai un ki zaban aur
karta huun yaqin jitna main baḌhta hai guman aur
manzil ka junun hai to har ik gaam hai manzil
miTta hai nishan aur ka to milta hai nishan aur
parvane ke matam men bujhi sham.a ye kah kar
tere liye hazir hai ye thoḌa sa dhuan aur
pur-dard jo dil men unhen roko na fughan se
hote hain ye ḳhamosh to karte hain fughan aur
yarab ye suna hai vo samajhte nahin urdu
de aur dil un ko jo na de mujh ko zaban aur
hota hai fuzun yaas men soz-e-gham-e-ulfat
bujhta hai to hota hai ye dil shoa.la-fishan aur
apnon hi se tum ishq men ghabra ga.e sahab
is raah men haa.il hain abhi sang-e-garan aur
duniya men to mamnua hai jannat men hai jaa.ez
kya baat hai vaa.iz ki yahan aur vahan aur
hoti hai zaban band to kya kuchh nahin kahti
rukti hai ye talvar to hoti hai ravan aur
asnam-tarashi bhi baḌi chiiz hai lekin
hai nazuki-e-kargah-e-shisha-garan aur
kahne ko to ai ‘arsh’ suḳhan-sanj hain ham bhi
haq ye hai ki ‘ghalib’ ka hai andaz-e-bayan aur
Leave a Reply