Dil to Phulon Se Ba-Tahrik-E-Gham-E-Dil Bandha

Khwaja Shauq

dil to phulon se ba-tahrik-e-gham-e-dil bandha

ham ne gulshan se magar ḳhud ko ba-mushkil bandha

vaqt-o-halat ne mahaul ajab mil bandha

qatl-gahon ne saman surat-e-mahfil bandha

bandhte kya the ta.alluq ke ye rishte ham ko

jabr-e-fitrat hai ki be-tauq-o-salasil bandha

kaun pahuncha hai sar-e-manzil-e-hasti ab tak

jo jahan rah gaya thak kar use manzil bandha

tum se roka na gaya haath kisi qatil ka

jab bhi bandha hai faqat bazu-e-bismil bandha

azmana tha mere zauq-e-nazar ko shayad

har jagah us ne naya parda-e-ha.il bandha

ham ne jab se tiri rahon men qadam rakha hai

kisi manzil ka tasavvur bhi ba-mushkil bandha

ghair agar sazishen karte to koi baat bhi thi

morcha apnon ne apnon ke muqabil bandha

qadam-e-qafila-e-umr hain sansen kya hain

be-irada bhi mila har koi mahmil bandha

ḳhun-e-maqtul men kya shan-e-ravadari thi

chashm-e-insaf ne qatil ko na qatil bandha

zindagi ‘shauq’ hamari bhi ajab guzri hai

dil uThaya na zamane se kabhi dil bandha