dil shadman ho ḳhuld ki bhi aarzu na ho
gar tu mile ḳhuda ki mujhe justuju na ho
ankhen tujhe na paa.en to kuchh bhi na pa saken
gar tu na ho to kuchh bhi mire ru-ba-ru na ho
chubhti hui kahe hai zaban se har ek baat
tu ḳhuub hai jo talḳh tiri guftugu na ho
uThti nahin nigah bhi ai dil tire sabab
kis se mujhe shikast ho dushman jo tu na ho
mahbub gar mile to mile vo nasib se
lutf-o-karam na ho to sitam ki bhi ḳhu na ho
har ḳhub-ru ho shoḳh-ada aur vafa-shi.ar
kis kaam ka hai phuul agar rang-o-bu na ho
izzat bhi ek chiiz hai duniya men ai ‘falak’
us ghar na ja jahan ki tiri aabru na ho
Leave a Reply