dil se dil ke vaste paigham kaise aa gaya
mere honTon par tumhara naam kaise aa gaya
un ki mahfil men hamara naam kaise aa gaya
aaj zikr-e-gardish-e-ayyam kaise aa gaya
dil si shai ne kaise rasm-e-arzu kar li qubul
ta.ir-e-aflak zer-e-dam kaise aa gaya
log kahte hain masarrat zindagi ka naam hai
phir ye mujh par ziist ka ilzam kaise aa gaya
ishrat-e-ahd-e-guzashta kis tarah yaad aa ga.i
haath men a.ina-e-ayyam kaise aa gaya
shisha-e-dil bas-ki nazuk ishq ki mai tund-o-tez
tum pe ilzam-e-shikast-e-jam kaise aa gaya
fikr ke badal jabin-e-husn par ‘ehsas’ kyuun
ye sahar ke vaqt zikr-e-sham kaise aa gaya
Leave a Reply