dil se arman nikal rahe hain
mere bhi din badal rahe hain
varna ghar men hai ghup andhera
yadon ke charagh jal rahe hain
ye ajab log hain ki un ke
paanv nahin pe chal rahe hain
ham dar-e-shah par savali
aaj hain aur na kal rahe hain
vo hi pahunchenge yaar tak jo
girte girte sambhal rahe hain
ham niko naam to hue par
dil pe aare se chal rahe hain
un ko azad kar jo ab tak
zer-e-habs-e-ilal rahe hain
un ko mahbus kar jo kab se
qa.ede sab kuchal rahe hain
kah na karb-o-bala ka qissa
lafzon ke dil dahal rahe hain
Leave a Reply