Dil-O-Nigah Ko Viran Kar Diya Maine

Zafar Iqbal Zafar

dil-o-nigah ko viran kar diya main ne

shikast-e-ḳhvab ka elaan kar diya main ne

jo tiir aa.e the us ki taraf se siine par

saja ke zaḳhmon ka gul-dan kar diya main ne

ghamon ka taaj mire sar pe jab se rakkha hai

ḳhud apne aap ko sultan kar diya main ne

na koi phuul hi rakha na aarzu na charagh

tamam ghar ko bayaban kar diya main ne

vo chahta tha ki sab kuchh luTa ke zinda rahun

lo aaj puura ye arman kar diya main ne

main zad pe tiron ke ḳhud aa gaya huun aaj ‘zafar’

tire nishane ko asan kar diya main ne