dil muzmahil hai teri navazish ke bavajud
ye sarzamin udaas hai barish ke bavajud
ḳhira na kar sake nigah-e-imtiyaz ko
jhuTe nagin numud-o-numa.ish ke bavajud
ek phuul bhi chaman men na dil khol kar hansa
shabnam ke ansuon ki guzarish ke bavajud
kya qahr hai ki jhuuT men milti hai afiyat
sach bolna muhal hai ḳhvahish ke bavajud
mera vaqar ziist na majruh kar sake
dushman hazar hila-o-sazish ke bavajud
apni ghalat ravish ko na tabdil kar sake
kuchh dost baar baar guzarish ke bavajud
barḳhud ghalat kabhi na hue zindagi men ‘lais’
duniya-e-fan men dad-o-sata.ish ke bavajud
Leave a Reply