dil mira jis se bahalta koi aisa na mila
but ke bande mile allah ka banda na mila
bazm-e-yaran se phiri bad-e-bahari mayus
ek sar bhi use amada-e-sauda na mila
gul ke ḳhvahan to nazar aae bahut itr-farosh
talib-e-zamzama-e-bulbul-e-shaida na mila
vaah kya raah dikhai hai hamen murshid ne
kar diya kaabe ko gum aur kalisa na mila
rang chehre ka to college ne bhi rakkha qaaim
rang-e-batin men magar baap se beta na mila
sayyad utthe jo gazette le ke to lakhon laae
shaiḳh quran dikhate phire paisa na mila
hoshyaron men to ik ik se siva hain ‘akbar’
mujh ko divanon men lekin koi tujh sa na mila