dil men rahta hai koi dil hi ki ḳhatir ḳhamosh
jaise tasvir men baiTha ho musavvir ḳhamosh
dil ki ḳhamoshi se ghabra ke uThata huun nazar
ek avaz si aati hai musafir ḳhamosh
is ta.aruf ka na aghaz na anjam koi
kar diya ek ḳhamoshi ne mujhe phir ḳhamosh
kuchh na sun kar bhi to kahna hai ki haan sunte hain
kuchh na kah kar bhi to hona hai bil-aḳhir ḳhamosh
Duub sakti hai ye kashti tiri sargoshi se
ai mire ḳhvab mire hami-o-nasir ḳhamosh
chyunTiyan reng rahi hain kahin andar ‘adil’
ham hain divar ke manind ba-zahir ḳhamosh
Leave a Reply