riyaz-khairabadi

Hum Bhi Piyen Tumhein Bhi Pilaen Tamam Raat

ham bhi piyen tumhen bhi pilaen tamam raat

jagen tamam raat jagaen tamam raat

un ki jafaen yaad dilaen tamam raat

vo din bhi ho ki un ko sataen tamam raat

zahid jo apne roze se thoda savab de

mai-kash use sharab pilaen tamam raat

ai qais be-qarar hai kuchh kohkan ki ruuh

aati hain be-sutun se sadaen tamam raat

ta subh mai-kade se rahi botalon ki maang

barsen kahan ye kaali ghataen tamam raat

khalvat hai be-hijab hain vo jal rahi hai shama

achchha hai us ko aur jalaen tamam raat

shab-bhar rahe kisi se ham-aghoshiyon ke lutf

hoti rahen qubul duaen tamam raat

daabe rahi paron se nasheman ko raat bhar

kya kya chali hain tez havaen tamam raat

kaata hai saanp ne hamen sone bhi do ‘riyaz’

un gesuon ki li hain balaen tamam raat

More Poems

Leave a Comment