Iliyas Babar Aawan
dil men kitni vahshat paali ja sakti hai
beach ki koi raah nikali ja sakti hai
tere chhoTe se dil men main kya a.unga
lekin ik tasvir sambhali ja sakti hai
zehn baḌa saffak musavvir ho sakta hai
saans talak zanjir men Dhali ja sakti hai
aisa ho to dastar-ḳhvan khula kar dena
chuTki men ghar ki bad-hali ja sakti hai
jis par baḌe baḌon ne haath khaḌe kar Daale
do honTon se baat sambhali ja sakti hai
vahan vahan par diip jalane ja sakta huun
jahan jahan par goli gaali ja sakti hai
Leave a Reply