dil men auron ke liye kina-o-kad rakhte hain
log iḳhlas ke parde men hasad rakhte hain
aap se haath milate hue Dar lagta hai
aap to pyaar ke rishton men bhi had rakhte hain
ye zaruri nahin dil un ke hon haq se ma.amur
vo jo chehron pe ibadat ki sanad rakhte hain
kya pata kab kisi rishte ka bharosa TuuTe
aise logon se na miliye jo hasad rakhte hain
dafn ho jaa.e na ehsas-e-mohabbat dil men
ab kahan dil ka ḳhayal ahl-e-ḳhirad rakhte hain
kaun hota hai musibat men kisi ka ‘salim’
ham abas aap se ummid-e-madad rakhte hain
Leave a Reply