dil mat tapak nazar se ki paaya na jaega
juun ashk phir zamin se uthaya na jaega
rukhsat hai baghban ki tanik dekh len chaman
jaate hain vaan jahan se phir aaya na jaega
kaaba daha to gham na kar ai shaikh-e-but-shikan
dil barhaman ka hai ki banaya na jaega
aane se fauj-e-khat ke na ho dil ko mukhlisi
bandhua hai zulf ka ye chhutaya na jaega
pahunchenge us chaman men na ham daad ko kabhu
juun gul ye chak-e-jeb silaya na jaega
tegh-e-jafa-e-yar se dil sar na pheriyo
phir munh vafa ko ham se dikhaya na jaega
avega vo chaman men na ai abr jab talak
paani gulon ke munh men chuvaya na jaega
ammame ko utaar ke padhiyo namaz shaikh
sajde se varna sar ko uthaya na jaega
zahid gile se maston ke baaz aane ka nahin
ta mai-kade men la ke chhakaya na jaega
zalim na main kaha tha ki is khuun se darguzar
‘sauda’ ka qatl hai ye chhupaya na jaega
daman-o-dagh-e-tegh ko dhoya to kya hua
aalam ke dil se daagh dhulaya na jaega
Leave a Reply