Sauda Mohammad Rafi
dil le ke hamara jo koi talib-e-jan hai
ham bhi ye samajhte hain ki ji hai to jahan hai
har ek ke dukh-dard ka ab zikr-o-bayan hai
mujh ko bhi ho rukhsat mire bhi munh men zaban hai
is ishq ke hai tu hi saza-var ki har ek
dil de ke tire naam ko juya-e-nishan hai
juinda-e-har-chiz hai yabinda jahan men
juz umr-e-guzishta ki vo dhundo to kahan hai
piiri jo tu jaave to javani se ye kahna
khush rahiyo mari jaan tu jidhar hai jahan hai
pahuncha na koi murgh kabhu apne chaman tak
juz tair-e-hasrat ki vo yaan bal-fishan hai
tujh se to kisu tarah mira kuchh nahin chalta
juz khuun ki ankhon se shab o roz ravan hai
saaqi tu nazar kijiyo tuk subh-e-chaman ko
is piir ke jalve ka bhala koi javan hai
‘sauda’ ka tire dasht men tiflan se hai ye haal
jidhar vo khada hove to juun sang-e-nishan hai
Leave a Reply