Shakeel Badayuni
dil lazzat-e-nigah karam pa ke rah gaya
kitna hasin khvab nazar aa ke rah gaya
lab tak shikayat-e-gham-e-dil la ke rah gaya
un ki nadamaton pe main sharma ke rah gaya
mere dil-e-tabah ka aalam na puchhiye
ik phuul tha jo khilte hi murjha ke rah gaya
manzil se duur rahrav-e-manzil tha mutmain
manzil qarib aai to ghabra ke rah gaya
shoridgi-e-nala-e-gustakh kya kahun
is qalb-e-naznin ko bhi tadpa ke rah gaya
be-gana-var jab vo guzarte chale gae
kuchh be-qarar dil mujhe samjha ke rah gaya
un ke huzur lab to mukarrar na khul sake
rudad-e-gham nigah se dohra ke rah gaya
yuun khatm dastan-e-mohabbat hui ‘shakil’
jaise koi hasin ghazal ga ke rah gaya
Leave a Reply