Tajdar Adil
dil ko us ka ḳhayal paiham hai
vaqt ko ye malal paiham hai
ḳhvahishon ka tiri huzuri men
vahi dast-e-saval paiham hai
us ki qurbat ki aag hai dil men
asman par malal paiham hai
karobar-e-jahan men yaad us ki
jaise koi kamal paiham hai
zaḳhm bharte nahin hain yadon ke
lazzat-e-indimal paiham hai
vo nahin hai to vaqt kuchh bhi nahin
vahi bas ek haal paiham hai
aarzu bhi nahin rakhi us ki
ishq ko ye malal paiham hai
kaun hai ashna haqiqat ka
zehn men ik ḳhayal paiham hai
ab musafir safar se Darte hain
manzilon ko zaval paiham hai
mustaqil kuchh nahin hai duniya men
arzu-e-visal paiham hai
zindagi men hamari kya hai faqat
karam-e-zul-jalal paiham hai
zikr us ka hai is tarah ‘adil’
jaise apni misal paiham hai
Leave a Reply