dil ko le kar ham se ab jaan bhi talab karte hain aap
lijiye hazir hai par ye to ghazab karte hain aap
morid-e-taqsir gar hote to lazim thi saza
ye jafa phir kahiye ham par kis sabab karte hain aap
karte ho abru se kushta rukh se dete ho jila
husn men eajaz kya kya roz-o-shab karte hain aap
qais se jo tha kiya dar-parda laila ne suluk
so vahi ai mehrban ham se bhi ab karte hain aap
be-kali hoti hai hasrat se dil-e-sad-chak ko
apni zulf-e-ambarin ko shana jab karte hain aap
ham ne puchha phir bhi us ki jaan phiri sab jism men
nazaa men duuri se jis ko jan-ba-lab karte hain aap
hans ke farmaya ‘nazir’ apni dua-e-lutf se
ye bhi ho sakta hai kya is ka ojab karte hain aap