Dil Ki Aawaz Mein Aawaz Milate Rahiye

Hafeez Banarasi

dil ki avaz men avaz milate rahiye

jagte rahiye zamane ko jagate rahiye

daulat-e-ishq nahin bandh ke rakhne ke liye

is ḳhazane ko jahan tak ho luTate rahiye

zindagi bhi kisi mahbub se kuchh kam to nahin

pyaar hai us se to phir naaz uThate rahiye

zindagi dard ki tasvir na banne paa.e

bolte rahiye zara hanste hansate rahiye

ruThna bhi hai hasinon ki ada men shamil

aap ka kaam manana hai manate rahiye

phuul bikhrata hua main tau chala ja.unga

aap kanTe miri rahon men bichhate rahiye

bevafa.i ka zamana hai magar aap ‘hafiz’

naghma-e-mehr-o-vafa sab ko sunate rahiye