Dattatriya Kaifi
dil kho gaya hamara kisi se mila ke haath
ho dastaras to kaTiye duzd-e-hina ke haath
ik tasma rah gaya hai rag-e-jan ka laga hua
jhuTa paḌa hai aah kahan un ka ja ke haath
hathon pe ham ko naag khilane ki mashq hai
chhute hain ham jabhi tire gesu baḌha ke haath
phaila le paanv khol ke dil ai shab-e-firaq
baiThe hain ham bhi ziist se apni uTha ke haath
kyuun hath-paon mere ḳhushi se na bhuul jaa.en
ungli chubove haath men jab vo mila ke haath
vo aaḌe hathon luun ki akaḌ saari bhuul jaa.e
munh ki na khana shaiḳh-ji ham se mila ke haath
sarson jamani hathon pe yuun siikh le koi
dil se mila liya hai dil un se mila ke haath
ye bekasi ke hathon hua hai hamara haal
paigham bhejte hain ham un ko saba ke haath
‘kaifi’ na nazuki pe tum is but ki bhulna
dekhe nahin abhi kisi nazuk-ada ke haath
Leave a Reply