Idris Babar
dil ke ghuTne ko ishara samjho
dahr ye apna ḳhasara samjho
ye bhi mumkin hai ki tum duur ke log
is alaav ko sitara samjho
ye bhi ik mauj hai miTTi ki sahi
vaqt kam hai to kinara samjho
par nahin hote ḳhayalon ke to phir
kaise uḌte hain ghubara samjho
kise ma.alum ḳhazana mil jaa.e
koi naqsha to dobara samjho
khet rul ja.enge pagal-pan men
jang kaisi mujhe haara samjho
Leave a Reply