obaidullah-aleem

Dil Hi The Hum Dukhe Hue Tumne Dukha Liya To Kya

dil hi the ham dukhe hue tum ne dukha liya to kya

tum bhi to be-aman hue ham ko sata liya to kya

aap ke ghar men har taraf manzar-e-mah-o-aftab

ek charagh-e-sham agar main ne jala liya to kya

baagh ka baagh aap ki dastaras-e-havas men hai

ek gharib ne agar phuul utha liya to kya

lutf ye hai ki aadmi aam kare bahar ko

mauj-e-hava-e-rang men aap naha liya to kya

ab kahin bolta nahin ghaib jo kholta nahin

aisa agar koi khuda tum ne bana liya to kya

jo hai khuda ka aadmi us ki hai saltanat alag

zulm ne zulm se agar haath mila liya to kya

aaj ki hai jo karbala kal pe hai us ka faisla

aaj hi aap ne agar jashn mana liya to kya

log dukhe hue tamam rang bujhe hue tamam

aise men ahl-e-sham ne shahr saja liya to kya

padhta nahin hai ab koi sunta nahin hai ab koi

harf jaga liya to kya sher suna liya to kya

More Poems

Leave a Comment