dil-e-na-mutma.in andesha-e-barq-e-tapan men hai
jo be-tabi qafas men thi vahi ab ashiyan men hai
miri be-tabi-e-dil ki samajh men kuchh nahin aata
ḳhuda jaane tira harf-e-tasalli kis zaban men hai
yahi andaz hain to gham nahin kuchh buad-e-manzil ka
umangen jaag uThi hain zindagi si karvan men hai
usi ke raag se gunjenge kal rahen masarrat ki
ye maana aaj insan manzil-e-ah-o-fughan men hai
koi nisbat nahin manzil-rasi ko rah-navardi se
vo lazzat kamyabi men kahan jo imtihan men hai
ye taḳhsis-e-chaman kya iltija-e-baghban kaisi
bahut ai himmat-e-parvaz gunja.ish jahan men hai
Leave a Reply