dil bujh gaya to garmi-e-bazar bhi nahin
ab zikr-e-bada-o-lab-o-ruḳhsar bhi nahin
apna tha ḳhalvaton men kabhi partav-e-jamal
qismat men ab to saya-e-divar bhi nahin
shikva zaban pe phuul se ahbab ka ghalat
ai dost mujh ko to gila-e-ḳhar bhi nahin
aaya na raas aap ko ai shaiḳh roz-e-hashr
aur lutf ye hai aap gunahgar bhi nahin
qaa.em huun apni tauba pe main aaj bhi magar
koi hasin pila.e to inkar bhi nahin
kya kijiye numa.ish-e-gham ḳhun-e-dil ke ba.ad
ab arzu-e-dida-e-ḳhunbar bhi nahin
elan-e-be-ḳhudi hai har ik qatra-e-lahu
mere junun ki had rasan-o-dar bhi nahin
nur-e-sahar ke naam pe bhaTken na qafile
dar-asl abhi to sub.h ke asar bhi nahin
vaa.iz ḳhayal-e-tauba baja hai magar abhi
main to ba-qadr-e-zarf gunahgar bhi nahin
Leave a Reply