dikha.i denge jo gul mez par qarine se
hava.en chheḌengi aa kar khule dariche se
ḳhala men aaj sakun apna DhunDhta hai vahi
bahal gaya tha jo bachcha kabhi khilaune se
tumhare dil men hai ik karb sa kisi ke liye
ye baat ham ne paḌhi hai tumhare chehre se
jale dil to yaqinan labon pe hogi karah
dhuan to phailega jangal men aag lagne se
faza men surat-e-shahin buland ho kar dekh
dikha.i denge ye unche daraḳht chhoTe se
suna.i di hai kahin kya ḳhizan ke panon ki chaap
ki phuul aaj hain gulshan men sahme sahme se
chalo ki puchhen kisi soḳhta-jigar se ye baat
gurez hota hai kab aadmi ko jiine se
vafa na TuTne vaali hai ek shai ‘shariq’
karo vafa ko na ta.abir kachche dhage se
Leave a Reply