Jaun Eliya
diid ki ek aan men kar-e-davam ho gaya
vo bhi tamam ho gaya main bhi tamam ho gaya
ab main huun ik azaab men aur ajab azaab men
jannat-e-pur-sukut men mujh se kalam ho gaya
aah vo aish-e-raz-e-jan haae vo aish-e-raz-e-jan
haae vo aish-e-raz-e-jan shahr men aam ho gaya
rishta-e-rang-e-jan mira nikhat-e-naz se tiri
pukhta hua aur is qadar yaani ki khaam ho gaya
puchh na vasl ka hisab haal hai ab bahut kharab
rishta-e-jism-o-jan ke biich jism haram ho gaya
shahr ki dastan na puchh hai ye ajiib dastan
aane se shahryar ke shahr ghulam ho gaya
dil ki kahaniyan banin kucha-ba-kucha ku-ba-ku
sah ke malal-e-shahr ko shahr men naam ho gaya
‘jaun’ ki tishnagi ka tha khuub hi majra ki jo
mina-ba-mina mai-ba-mai jam-ba-jam ho gaya
naf-piyale ko tire dekh liya mughan ne jaan
saare hi mai-kade ka aaj kaam tamam ho gaya
us ki nigah uth gai aur men uth ke rah gaya
meri nigah jhuk gai aur salam ho gaya
Leave a Reply