Saleem Figar
diid ke badle sada dida-e-tar rakkha hai
ham ko kyuun randa-e-dargah-e-nazar rakkha hai
shab ki dahliz se us samt hain rahen kaisi
parda-e-ḳhvab men ye kaisa safar rakkha hai
saya-e-vasl-e-mohabbat ki vo ḳhalvat na sahi
ye bhi kaafi hai ḳhayalon men guzar rakkha hai
kitne ausaf mujhe apne ata us ne kiye
zauq-e-taḳhliq diya mujh men hunar rakkha hai
shaḳh-dar-shaḳh tiri yaad ki hariyali hai
ham ne shadab bahut dil ka shajar rakkha hai
har ghaḌi mujh pe na.e aur jahan khulte hain
so bhi ja.un to khula zehn ka dar rakkha hai
us ko qudrat hai jise jaisa bhi taḳhliq kare
shukr hai us ka mujhe us ne bashar rakkha hai
Leave a Reply