Kash Maqbul Ho Dua-E-Adu

kaash maqbul ho dua-e-adu

kya karun vo bhi mustajab nahin

ab to us chashm-e-tar ka charcha hai

zikr-e-dariya nahin sahab nahin

jama tufan-o-chashm-e-tar masraf

ab masarif ka kuchh hisab nahin

dho diya sab ko dida-e-tar ne

vo nahin dars vo kitab nahin

ishq-bazi ka munh chidana hai

aur vo mausam nahin shabab nahin

teri ankhon ke daur men kya kya

sehr rusva nahin kharab nahin

mukhtasar hal-e-chashm-o-dil ye hai

us ko aram us ko khvab nahin

jo sarapa-e-yar ‘azurda’

tere divan ka intikhab nahin

Leave a Comment