dho ga.i chehron se gard yaas ka ghaza hava
kar ga.i afsurda ruhon ko tar-o-taza hava
laakh baiThun chhup kar apne band kamron men magar
toḌ kar aa ja.egi ek ek darvaza hava
sub.h anchal ki hava de kar khilati hai jise
shab ko bikhrati hai ḳhud us gil ka shiraza hava
bhar chale the zaḳhm jo phir se lage munh kholne
kuchh purane dard le kar aa.i hai taaza hava
ji tarasta hai phir un lamhon ko jab yakja the sab
raqs-e-mai bu-e-saman rang-e-shafaq taaza hava
ham to apni ḳhana-virani ka matam kar chuke
dekh kar ja kar ab tu koi aur darvaza hava
vo latafat vo mahak kyuun ‘chand’ yaksar kho ga.i
bhar rahi hai kin ḳhataon ka ye ḳhamyaza hava
Leave a Reply