Nasreen Naqqash
der se raah pe aa.e ho magar aa.e ho
meri raton men sahar ban ke utar aa.e ho
yuun hai har samt mire ghar men charaghan ki bahar
jaise ban-bas se tum lauT ke ghar aa.e ho
bhuli yaden bhi dabe paanv chali aa.i hain
tum akele to nahin ho jo idhar aa.e ho
kis kami ka hua pardes men tum ko ehsas
kuchh to hai tum jo achanak hi idhar aa.e ho
shoḳhiyan aisi bhi kis kaam ki ham baaz aa.e
tum to aate hi shararat pe utar aa.e ho
saari duniya miri ankhon men simaT aa.i hai
ba.ad muddat ke jo tum mujh ko nazar aa.e ho
ho ga.e ghar se sabhi gham ke andhere ruḳhsat
tum jo aa.e ho ba-andaz-e-sahar aa.e ho
ye bhi ‘nasrin’ mohabbat ka karishma hai ki tum
saaf har moḌ se bach kar jo idhar aa.e ho
Leave a Reply