dekho to mere nala-o-ah-o-fughan ki or
baan is kadak se jaave hai kab asman ki or
masjid ko chhod aae kalisaiyan ki or
chhoda navah-e-kaaba chale ham butan ki or
zahid tire kamal pe maren hain pusht-e-pa
laae faro sar apna jo pir-e-mughan ki or
sukh niind be-khudi ki use turt aa gai
laaga jo gosh tuk bhi miri dastan ki or
tukde jigar ke bah chale ham-rah-e-sail-e-ashk
laata hai khinch khar-o-khas ab-e-ravan ki or
zalim silah bandh ke aana ba-qasd-e-qatl
kya hai zarur, apne kisi nim-jan ki or
kuchh kam nahin tiri nigah-o-abru-o-mizha
mat haath la tu khanjar-o-tegh-o-sinan ki or
teri nigah-e-mehr ne mujh se vo kuchh kiya
jo kuchh ki chashm-e-mah kare hai katan ki or
un ankhdiyon ki putliyon se aankh ja lagi
ja phirti naiin nigah ab un abruvan ki or
misraa ye apna aaya ‘jahandar’ ham ko yaad
chhoda navah-e-kaaba chale ham butan ki or
Leave a Reply