dekhne men jo lage sham-o-sahar ke sathi
vo to sathi the faqat rahguzar ke sathi
ab kahan hain vo mire ashk pirone vaale
ab kahan hain vo mire dida-e-tar ke sathi
tum ko dekha to mire dil ne kaha tum hi to ho
zakhm-e-dil zakhm-e-jigar zakhm-e-nazar ke sathi
is men kya shak zaman-afroz raha hai ye kalam
ham bhi rahte hain mudam ahl-e-nazar ke sathi
main akeli hi chali janib-e-manzil ‘afroz’
ham-safar thahre mire sirf safar ke sathi
Leave a Reply