dekhen qarib se bhi to achchha dikha.i de
ik aadmi to shahr men aisa dikha.i de
ab bhiik mangne ke tariqe badal ga.e
lazim nahin ki haath men kaasa dikha.i de
neze pe rakh ke aur mira sar buland kar
duniya ko ik charagh to jalta dikha.i de
dil men tire ḳhayal ki banti hai ik dhanak
suraj sa a.ine se guzarta dikha.i de
chal zindagi ki jot jaga.e ajab nahin
lashon ke darmiyan koi rasta dikha.i de
kya kam hai ki vajud ke sannaTe men ‘zafar’
ik dard ki sada hai ki zinda dikha.i de
Leave a Reply