Dekh tariKH Ke KHazane Mein

dekh tārīḳh ke ḳhazāne meñ

hai mirā zikr har zamāne meñ

yuuñ bhī umreñ qalīl hotī haiñ

kyoñ gañvāte ho āzmāne meñ

is kī qisteñ chukānī paḌtī haiñ

kuchh nahīñ lagtā dil lagāne meñ

ek lamhe meñ kho na denā use

lag ga.ī umr jis ko paane meñ

Daal deñge ḳhulūs kī chādar

aur kyā hai ġharīb-ḳhāne meñ

ġham na kiije ki ham to haiñ mash.hūr

jaan kar bhī fareb khāne meñ

thak ga.e āgahī ke haath ‘mujīb’

sang ko aa.ina banāne meñ

Leave a Comment