Sajjad Baluch
dekh paa.i na mire saa.e men chalta saaya
aa ga.i raat uThane mira Dhalta saaya
tum ne achchha hi kiya chhoḌ ga.e vaise bhi
ek saa.e se bhala kaise sambhalta saaya
main vahi huun mira saaya bhi vahi hai ab tak
main badalta to koi rang badalta saaya
main ne is vaste munh kar liya suraj ki taraf
mujh se dekha na gaya aage nikalta saaya
aaj bhi baiTha huun gum-sum pas-e-divar-e-ana
mujh se lipTa hai tiri yaad ka jalta saaya
tujh pe guzri hi nahin vahshat-e-sham-e-hijran
tu ne dekha hi nahin peḌ nigalta saaya
Leave a Reply