Jalal Lakhnavi
de sanam hukm tu dar par tire hazir ho kar
paḌ rahe koi musalman bhi kafir ho kar
chuTkiyan lene ko bas rah chuke pinhan dil men
kabhi pahlu men bhi aa baiThiye zahir ho kar
jab.ha-sa.i ka irada ho to pahuncha dega
dar tak us but ke ḳhuda hafiz-o-nasir ho kar
ghair kyon ham ko uThata hai tiri mahfil se
aap uTh ja.enge barḳhast-ḳhatir ho kar
DhunDte rah ga.e pahlu hi ta.ajjub hai ‘jalal’
hal-e-dil us ne na tum kah sake sha.ir ho kar
Leave a Reply