daur saghar ka chale saaqi dobara ek aur
abr kaaba se utha hai maan kahna ek aur
jhumta aata hai vo badal ka tukda ek aur
saqiya bhar kar pila de jam-e-sahba ek aur
din ko jo kuchh tum ne dekha ye to thi sab dil-lagi
shab ko rah jaao to dikhlaen tamasha ek aur
main unhen kahta huun tum bedard ho na-ashna
vo lagate hain mujhe ilzam ulta ek aur
dil ko nafrat ho gai nazron se akhir gir gae
tum se behtar apni aankhon men samaya ek aur
kyuun sisakta chhode jaate ho mujhe maqtal men tum
faisla kar duun main qurban de ke charka ek aur
tere aane men tavaqquf jab hua ai nama-bar
khat unhen bechain ho kar ham ne likkha ek aur
band mahram ke khule kuchh be-hijabi ho chuki
vo bhi ab uth jaae jo baaqi hai parda ek aur
dost dushman ho gae yaron ne ankhen pher liin
rah gaya hai aap ka mujh ko bharosa ek aur
vasl ki shab men kiya murgh-e-sahar ka band-o-bast
naara-e-allahu-akbar ka hai dhadka ek aur
ho chuka zikr-e-dahan vasf-e-kamar likhte hain ham
daam men sayyad ke phansta hai anqa ek aur
said ki kasrat se ‘agha’ ban padi sayyad ki
do ne gar paai rihai aa ke uljha ek aur
Leave a Reply