daulat-e-harf-o-bayan saath liye phirte hain
ham mohabbat ka jahan saath liye phirte hain
ik tabassum pe na jaana ki tire divane
gham ka ik koh-e-giran saath liye phirte hain
jis pe ik saans ki takrar se baal aa jaa.e
ham vo shishe ka makan saath liye phirte hain
andhiyan us ko bujhane ke liye hain betab
ham jo ye mish.al-e-jan saath liye phirte hain
dasht-e-ghurbat men buzurgon ki dua hai hamrah
saya-e-abr-e-ravan saath liye phirte hain
sang-e-dar se jo tire surat-e-saughat mila
raushni ka vo nishan saath liye phirte hain
ham ne dekha to nahin sirf suna hai ki ‘sarosh’
aj-kal sarv-e-ravan saath liye phirte hain
Leave a Reply