Akhtar Ul Iman
kaun sa station hai?
dasna hai sahib-ji
aap ko utarna hai?
”ji nahin, nahin,” lekin
dasna to tha hi vo
mere saath ‘qisar’ thi
ye badi badi ankhen
ik talash men khoi
raat bhar nahin soi
jab main us ko pahunchane
is ujaad basti men
saath le ke aaya tha
main ne un se phir puchha
aap mustaqil shayad
dasna men rahte hain?
”ji yahan pe kuchh meri
suut ki dukanen hain
kuchh taam-khane hain”
main suna kiya baitha
bolta raha vo shakhs
”kuchh zamin-dari hai
mere baap daada ne
kuchh makan chhode the
un ko bech kar main ne
karobar khola hai
is haqir basti men
kaun aa ke rahta tha
lekin ab yahi basti
bambai hai dilli hai
qimaten zaminon ki
itni badh gaiin sahib
ik zamin hi kya hai
khane piine ki chizen
aam jiine ki chizen
bhaao das-gune hain ab”
bolta raha vo shakhs
”is qadar girani hai
aag lag gai jaise
asman had hai bas”
main ne chaunk kar puchha
asman mahl tha ik
sayyadon ki basti men
asman nahin sahib
ab mahl kahan hoga?
hans pada ye kah kar vo
mere zehn men us ki
baat pai-ba-pai gunji
”ab mahl kahan hoga
is dayar men shayad
‘qaisar’ ab nahin rahti
vo badi badi ankhen
ab na dekh paunga
mulk ka ye batvara
le gaya kahan us ko
devdhi ka sannata
aur hamari sargoshi
”mujh se kitne chhote ho”
main ne kuchh kaha tha phir
us ne kuchh kaha tha phir
hai raqam kahan vo sab
dard ki giran-jani
meri shola-afshani
us ki jalva-samani
hai raqam kahan vo ab
karb-e-zist sab mera
guftugu ka dhab mera
us ka haath hathon men
le ke jab main kahta tha
ab chudao to janun
rasm-e-bevafai ko
aaj mo’tabar manun
us ko le ke bahon men
jhuk ke us ke chehre par
bhench kar kaha tha ye
bolo kaise niklogi
meri dastaras se tum
mere is qafas se tum
bhure badalon ka dal
duur udta jaata hai
ped par kahin baitha
ik parind gaata hai
”chil-chil” ik gilahri ki
kaan men khatakti hai
rail chalne lagti hai
raah ke darakhton ki
chhanv dhalne lagti hai
”mujh se kitne chhote ho”
aur miri giran-goshi
devdhi ka sannata
aur hamari sargoshi
hai raqam kahan vo sab?
duur us parinde ne
apna giit dohraya
”aaj ham ne apna dil
khuun kiya hua dekha
gum kiya hua paya”
Leave a Reply