adil-mansuri

Darwaza Band Dekh Ke Mere Makan Ka

darvaza band dekh ke mere makan ka

jhonka hava ka khidki ke parde hila gaya

vo jan-e-nau-bahar jidhar se guzar gaya

pedon ne phuul patton se rasta chhupa liya

us ke qarib jaane ka anjam ye hua

main apne-ap se bhi bahut duur ja pada

angdai le rahi thi gulistan men jab bahar

har phuul apne rang ki atish men jal gaya

kante se tutte hain mire ang ang men

rag rag men chand jalta hua zahr bhar gaya

ankhon ne us ko dekha nahin is ke bavajud

dil us ki yaad se kabhi ghafil nahin raha

darvaza khatkhata ke sitare chale gae

khvabon ki shaal odh ke main unghta raha

shab chandni ki aanch men tap kar nikhar gai

suraj ki jalti aag men din khaak ho gaya

sadken tamam dhuup se angara ho gaiin

andhi havaen chalti hain in par barhana-pa

vo aae thodi der ruke aur chale gae

‘adil’ main sar jhukae hue chup khada raha

More Poems

Leave a Comment