dard ke da.imi rishton se lipaT jaate hain
aks rote hain to shishon se lipaT jaate hain
haa.e vo log jinhen ham ne bhula rakkha hai
yaad aate hain to sanson se lipaT jaate hain
kis ke pairon ke nishan hain ki musafir bhi ab
manzilen bhuul ke raston se lipaT jaate hain
jab vo rota hai to yak-laḳht miri pyaas ke honT
us ki ankhon ke kinaron se lipaT jaate hain
jab unhen niind panahen nahin deti hain ‘asad’
ḳhvab phir jagti ankhon se lipaT jaate hain
Leave a Reply