Poet
dard ka dard se darman karte
yuun ilaj-e-gham-e-janan karte
ham agar fikr-e-gulistan karte
roz daman ko gareban karte
ghar ki virani se fursat na mili
varna ham sair-e-bayaban karte
kitna arzan hai gharibon ka lahu
aap to roz charaghan karte
dil umanD aaya tha baiThe baiThe
kaise andaza-e-tufan karte
dil ka ḳhuun aankh tak aa hi jaata
aap kuchh zikr-e-gulistan karte
umr guzri hai hamari ‘ehsas’
ḳhatir-e-sham-e-ghariban karte
Leave a Reply