hai duniya jis ka naanv miyan ye aur tarah ki basti hai
jo manhgon ko ye mahngi hai aur saston ko ye sasti hai
yaan har-dam jhagde uthte hain har-an adalat basti hai
gar mast kare to masti hai aur past kare to pasti hai
kuchh der nahin andher nahin insaf aur adl-parasti hai
is haath karo us haath mile yaan sauda dast-ba-dasti hai
jo aur kisi ka maan rakhe to us ko bhi arman mile
jo paan khila de paan mile jo roti de to naan mile
nuqsan kare nuqsan mile ehsan kare ehsan mile
jo jaisa jis ke saath kare phir vaisa us ko aan mile
kuchh der nahin andher nahin insaf aur adl-parasti hai
is haath karo us haath mile yaan sauda dast-ba-dasti hai
jo aur kisi ki jaan bakhshe to us ki bhi haq jaan rakhe
jo aur kisi ki aan rakhe to us ki bhi haq aan rakhe
jo yaan ka rahne vaala hai ye dil men apne jaan rakhe
ye turat-phirat ka naqsha hai is naqshe ko pahchan rakhe
kuchh der nahin andher nahin insaf aur adl parasti hai
is haath karo us haath mile yaan sauda dast-ba-dasti hai
jo paar utare auron ko us ki bhi paar utarni hai
jo gharq kare phir us ko bhi dubkon dubkon karni hai
shamshir tabar banduq sinan aur nashtar tiir nahrni hai
yaan jaisi jaisi karni hai phir vaisi vaisi bharni hai
kuchh der nahin andher nahin insaf aur adl-parasti hai
is haath karo is haath mile yaan sauda dast-ba-dasti hai
jo uupar uncha bol kare to us ka bol bhi baala hai
aur de patke to us ko bhi koi aur patakne vaala hai
be-zulm-o-khata jis zalim ne mazlum zabah kar daala hai
us zalim ke bhi lohu ka phir bahta naddi-nala hai
kuchh der nahin andher nahin insaf aur adl-parasti hai
is haath karo us haath mile yaan sauda dast-ba-dasti hai
jo misri aur ke munh men de phir vo bhi shakkar khata hai
jo aur taiin ab takkar de phir vo bhi takkar khata hai
jo aur ko daale chakkar men phir vo bhi chakkar khata hai
jo aur ko thokar maar chale phir vo bhi thokar khata hai
kuchh der nahin andher nahin insaf aur adl-parasti hai
is haath karo us haath mile yaan sauda dast-ba-dasti hai
jo aur kisi ko nahaq men koi jhuti baat lagata hai
aur koi gharib aur bechara haq na-haq men lut jaata hai
vo aap bhi luuta jaata hai aur lathi-pathi khata hai
jo jaisa jaisa karta hai phir vaisa vaisa paata hai
kuchh der nahin andher nahin insaf aur adl-parasti hai
is haath karo us haath mile yaan sauda dast-ba-dasti hai
jo aur ki pagdi le bhage us ka bhi or uchakka hai
jo aur pe chauki bithlave us par bhi dhons-dhadakka hai
yaan pushti men to pushti hai aur dhakke men yaan dhakka hai
kya zor maze ka jamghat hai kya zor ye bhid-bhadakka hai
kuchh der nahin andher nahin insaf aur adl-parasti hai
is haath karo us haath mile yaan sauda dast-ba-dasti hai
hai khatka us ke haath laga jo aur kisi ko de khatka
aur ghaib se jhatka khata hai jo aur kisi ke de jhatka
chire ke biich men chira hai aur patke biich jo hai patka
kya kahiye aur ‘nazir’ aage hai zor tamasha jhat-patka
kuchh der nahin andher nahin insaf aur adl-parasti hai
is haath karo us haath mile yaan sauda dast-ba-dasti hai
Leave a Reply