dar-o-divar pe ik saaya paḌa hai dekho
mere raste men koi jaise khaḌa hai dekho
zarra-e-ḳhak ko sar par liye phirti hai hava
aur patthar ki zamin men hi gaḌa hai dekho
is qadar bhiiḌ hai raste men ki chalna hai muhal
aur badal ki abhi sar pe khaḌa hai dekho
apni hi zaat ke saae men chhupa baiTha huun
ki mira saaya bhi to mujh se baḌa hai dekho
mauj-e-dariya ko samundar se mafar mushkil hai
lauT bhi aao ki ye rasta kaḌa hai dekho
koi to aae mujhe aa ke bachae is se
meri dahliz pe ik shaḳhs khaḌa hai dekho
sar pe tufan bhi hai samne girdab bhi hai
meri himmat ki vahi kachcha ghaḌa hai dekho
sar kaTa kar bhi khaḌa huun sar-e-maidan aḳhtar
is tarah jang yahan kaun laḌa hai dekho
Leave a Reply