da.imi hai ishq aur ik da.imi avaz hai
mere kanon men abhi tak bas vahi avaz hai
saath mere raat bhar jo jagti avaz hai
kaun jaane ye to meri ruuh ki avaz hai
hijr ke lamhon men ab tak ye ḳhabar kab ho saki
jagti huun main ya koi jagti avaz hai
hijr jaise vasl men us ko suna to yuun laga
maut jaisi zindagi men zindagi avaz hai
ajnabi si manzilon ki ajnabi si raah men
ik mukammal ḳhvab aur ik ḳhvab si avaz hai
aane vaale daur men ‘shahin’ rahna hai mujhe
sab kahenge ye vahi ik dukh bhari avaz hai
Leave a Reply