Dahshat Ke Mausam Mein Khilne Wale Phul

dahshat ke mausam meñ khilne vaale phuul

pattī pattī bikhre kaun sambhāle phuul

in hoñToñ ke lams meñ aisā jaadū hai

āñkhoñ par rakhte hī ho ga.e chhāle phuul

titlī terā rañg churāne aa.ī hai

ḳhush-rū titlī ke premī matvāle phuul

us kā rasta dekhne vaalī āñkhoñ meñ

tairte rahte haiñ kuchh mannat vaale phuul

maiñ ne vasl meñ hijr kī sargoshī sun lī

aur harī chādar par kāḌhe kaale phuul

us ne bhī rūmāl pe itr lagā bhejā

ham ne bhī sharmā kar kaan meñ Daale phuul

laal gulāb kā tohfa dene vaale sun

nahīñ haiñ tere lams se achchhe saale phuul

Leave a Comment