Dahliz Par Meri Koi Aaya Hai Barson Baad

dahliz par miri koi aaya hai barson baad

halchal si dil men koi to laaya hai barson baad

arman dil men mere nae jagne lage

angan ko chandni ne sajaya hai barson baad

ankhon men meri khvab hain taaza saje hue

tabir-e-khvab le ke vo aaya hai barson baad

palkon pe meri jalne lage diip kuchh nae

mere labon ne giit ye gaaya hai barson baad

phir shakh-e-dil pe gul nae ummid ke khile

mausam bahar-e-taza ka aaya hai barson baad

tanhai meri baant li hai us ne pyaar se

naam aaj le ke us ne bulaya hai barson baad

us ne bhi tuut kar hamen chaha bahut ‘dua’

ham ne bhi qurb us ka yuun paaya hai barson baad

Leave a Comment